ចាកាតា៖ ការប្រកួត AFF Championship ប្រកួតទីពីររបស់កម្ពុជា​ បានបញ្ចប់ទៅមុននេះបន្តិច ជាមួយលទ្ធផលបរាជ័យ ២-១ ទល់នឹងក្រុមម្ចាស់ផ្ទះឥណ្ឌូណេស៊ីនៅកីឡដ្ឋាន Gelora Bung Karno។

ការប្រកួតក្រោមការកាត់សេចក្តីដោយអាជ្ញាកណ្តាលជប៉ុន លោក Ryuji Sato នេះ ម្ចាស់ផ្ទះឥណ្ឌូណេស៊ី បានបើកការនាំមុខមុននៅនាទីទី៧ ដោយគ្រាប់បាល់របស់កីឡាករ Egy Maulana Vikri មុនពេលកីឡាករ សារ៉េត គ្រីយ៉ា​ របស់ព្រះខ័នរាជស្វាយរៀងតាមស្មើបានសម្រេចនៅនាទីទី១៦ ខណៈម្ចាស់ផ្ទះនៅតែបន្តបើកការនាំមុខសាជាថ្មីនៅនាទីទី៣៥​ ដោយគ្រាប់បាល់របស់កីឡាករ Witan Sulaeman ដោយលទ្ធផលនេះរក្សារហូតដល់ចប់ការប្រកួតតែម្តង។

ដោយឡែក ក្រុមហ្វីលីពីនក៏ដណ្តើមបានជ័យជម្នះវិញសម្រាប់ការប្រកួតទីពីររបស់ខ្លួនវិញផងដែរ ដោយយកឈ្នះក្រុមភ្ញៀវព្រុយណេក្នុងលទ្ធផល ៥-១ ដើម្បីបន្តក្តីសង្ឃឹមប្រជែងកៅអីទៅវគ្គពាក់កណ្តាលផ្តាច់ព្រ័ត្រ ក្រោយប្រកួតដំបូងហ្វីលីពីនចាញ់កម្ពុជា ៣-២ នៅពហុកីឡដ្ឋានជាតិមរតកតេជោ។ 

ប្រកួតបន្ទាប់នៅថ្ងៃទី២៦ ខែធ្នូខាងមុខនេះ កម្ពុជានឹងត្រូវសម្រាក ខណៈព្រុយណេ ត្រូវទទួលស្វាគមន៍ក្រុមឥណ្ឌូណេស៊ី និងថៃទទួលស្វាគមន៍ក្រុមហ្វីលីពីន។ ប្រកួតបន្ទាប់របស់កម្ពុជា នឹងធ្វើឡើងនៅថ្ងៃទី២៩ ដោយគោព្រៃកម្ពុជា នឹងត្រូវបើកទ្វារពហុកីឡដ្ឋានជាតិមរតកតេជោទទួលក្រុមភ្ញៀវព្រុយណេ មុនធ្វើដំណើរទៅជួបក្រុមជម្រើសជាតិថៃ នាថ្ងៃទី០២ ខែមករា ឆ្នាំ២០២៣ នៅពហុកីឡដ្ឋាន Thammasat Stadium៕